تعالوا يا فلاحين نتكلم في السياسة (للفلاحين فقط ممنوع دخول الافندية)يا محمد افندي السياسة بحرها واسع و احنا ناس غلابة
- ده انتم اصل السياسة و الكياسة
طيب انا اسال سؤال اعرف منه ان كان لكم في السياسة و لا لا
لو الفلاح رايح السوق و الحمار حرن بيعمل ايه ؟؟؟
الفلاحين : فيه ناس بتضربه و تعدمه العافية لكن فيه ناس بتسايسه
بس كده ...
الفلاح اللي بيسايس الحمار بيفهم سياسة او ممكن لو اتعلم شوية يقدر يغلب السياسيين الكبار
الفلاحين : ضحكوا
انتم مش مصدقني
هو النبي كان بيشتغل ايه و هو صغير
الفلاحين : راعي غنم
ليه ربنا اختار له الشغلانة دي ؟؟؟ علشان يعلمه السياسة
و كل الانبياء تقريبا كانوا لازم ياخدوا دبلوم عملي في السياسة
حتى سيدنا موسى اللي اتربى في قصر الفرعون اشتغل 10 سنين في الرعي علشان يتعلم السياسة
و انا لو نويت اؤسس حزب حروح بلد بعيدة اقضي فيها يومين في رعي الغنم
الفلاحين : ازاي بس ده بتوع السياسة بيقولوا كلام صعب
لان بتوع السياسة مش بيفهموا في السياسة
لو كانوا بيفهموا في السياسة كانوا اتكلموا كلام عادي
انتم مفكرين ان اوباما و لا رؤساء امريكا بيكلموا الناس كلام كبير دول فاضلهم شوية و يكلموا ستات البيوت في الطبيخ و يعملوا ايه لما اللحمة سعرها يشد و يغلى
تحبوا اقولكم تفسير الكلام الصعب اللي بتسمعوه من بتوع السياسة
انتم تسمعوا ان حزب له ايدلوجية معينة
يعني حزب له دماغ لوحده (قلنا في العنوان الافندية يتركوني اكلم الفلاحين لان الكلام خاص بهم)
الفلاحين :طيب يعني ايه براجماتي ؟
يعني بيدور على المصلحة
الفلاحين : طيب يعني ايه راديكالي ؟؟
هو ع البراجماتي يعني بيهتم بالمبادئ
الفلاحين : طيب مين فيهم الصح او مين فيهم السياسي الاحسن بتاع المصالح اللي بيخلص لكن ممكن يكون اناني يبيع ابوه و لا بتاع المبادئ و وجع الدماغ و ممكن يكون مقفل دماغه
المصري اللي متربي صح و عارف دينه صح لازم يكون عنده مبادئ و في نفس الوقت يدور على المصلحة
يعني يطبق المثل : اللي يعوزه البيت يحرم على الجامع
و ده مثل كان بيتقال زمان ايام ما كانوا بينوروا الجوامع بمصابيح الزيت
و معناه ان لما يكون عيالك جعانين تاكلهم قبل ما تهتم تنور مصباح الجامع
الفلاحين: طيب مين احسن الحكومة و الحزب الوطني و لا الاخوان ؟؟
لو عاوزين تعرفوا انا بحب مين اكتر اقولكم انا بحب الاخوان اكتر رغم اني مش منهم
لكن لو عاوزين المصلحة اقولكم كلام تاني
الفلاحين : كلام تاني ازاي ؟
من مصلحتنا ان يكون فيه احزاب كتير و كلها تكون موجودة في مجلس الشعب و المحليات و حتى في العمد و المشايخ
لانهم لما يكونوا كتير حيتنافسوا مين يخدمنا اكتر علشان ياخد اصواتنا
الفلاحين : بس لما يكون فيه احزاب كتير ممكن يعملوا فتنة و البلد تخرب
يعني شوفت العراق كان صدام ماسكها صح لكن لما طلعت الاحزاب و الاكراد و اشي شيعي و اشي سني البلد ولعت و الامريكان مبرطعين فيها
العراق ولعت لان الاحزاب لم تتنافس في خدمة الناس و لان صدام الله يرحمه بقى كان من مصلحته انه يخليهم يكرهوا بعض و يخافوا من بعض علشان يفضل هو المتحكم
اقولكم على حاجة
احنا لازم نفضل شعب واحد و نخلي بتوع السياسة يتنافسوا على اصواتنا
لكن بتوع السياسة لما بيمسكوا بيبقى نفسهم انهم يبقوا يد واحدة و يقسمونا شيع و طوائف نكره بعضنا و نخاف من بعض زي ما فرعون ما كان مقسم اهل مصر شيع و طوائف علشان يشفط خيرها و ينهبها و محدش يعرف يصده عن ظلمه
احنا بقى مصلحتنا اننا نخليهم يتنافسوا و منقطعش في بعض
الفلاحين : ازاي نعملها دي دي مسالة صعبة جدا ؟؟
فلاحين امريكا اجدع منكم
عندهم في امريكا حزبين كبار حزب اسمه الجمهوري و حزب تاني اسمه الديمقراطي
يعني شبه الحزب الوطني و الاخوان عندنا كده
بس فلاحين امريكا ناصحين عننا
هناك عندهم لو انتخبوا الرئيس من الحزب الجمهوري لازم ينتخبوا مجلس الشعب بتاعهم من الحزب الديمقراطي
الفلاحين : يا ولاد اللئيمة .... لكن فلاحين امريكا متعلمين و بيزرعوا بالكهربا لكن احنا يعني على قد حالنا
يا عمي و الله الفلاح منكم بيفهم اكتر من فلاحين امريكا
على الاقل انت بتخرجوا و تسافروا و تشوفوا الدنيا و تحجوا لبيت الله الحرام و عارفين الدنيا و عارفين ان فيه بلاد تانية في العالم
لكن فلاحين امريكا ما يعرفوش ان العالم فيه بلاد تانية غير بلادهم و شوية بلاد تانية و خلاص يا راجل ده فيهم ناس بتيجي و تصور جنب الهرم و هي مفكرة نفسها في رحلة سياحية في اسرائيل
الفلاحين: يضحكون
طيب انا حسالكم سؤال تخيلوا لو الاخوان نسبتهم كترت في المجلس و الحزب الوطني حب يعمل فيهم مقلب و قال نخلي عندنا شوية ديمقراطية و اعطى للاخوان وزارة صعبة و معقربة
مثلا مسكهم وزارة الصحة بمستشفياتها اللي تجيب المرض
ايه اللي حيصل؟؟
الفلاحين : ياه دا انت ساعتها حتلاقي الاخوان الكتير اللي بيزعقوا في المظاهرات دول قاعدين في المستشفيات ينظفوا فيها ليل نهار و يعطوا لكل واحد داخل و لا خارج من المستشفى حتة شكولاتة
عرفتم بقى انكم بتفهموا احسن من فلاحين امريكا .. ده انتم اصل البراجماتية اللي كنتم بتسالوني على معناها ... ده انتم تدرسوهالهم و تفهموها لعيالهم عملي
الفلاحين : ضحكوا ... امال ايه اللي جايبنا لورا كده لما احنا بنفهم احسن منهم
لا ده موضوع كبير
نلتقي بعد الفاصل و لو الفاصل مكانش فيه ديك رومي او حتة بطة يبقى مفيش كلام عندي غير اللي قلته
سلام
و نحن الان في انتظار البطة
» اعطال ايديال زانوسي 01099948826
» صيانه ايديال زانوسى
» صيانه ايديال زانوسى
» صيانه ايديال زانوسى
» صيانه ايديال زانوسى
» صيانه ايديال زانوسى
» صيانه ايديال زانوسى
» صيانه ايديال زانوسى